Luke 12: 39-48
Hinanleh tami thei un, inn neipa’n gutate bang hun a hingpei ding uh chi theileh, ana zanhah dinga a inn abulusah sih ding hi. Noute zong kigingsa a na um ding uh ahi; ajiehpen mihing Tapa na kigintaatlou laitah ua hingpei ding ahi,” achi hi.
Gin-um suoh leh gin-umlou suoh
Khumin Peter in, “Topa aw tami thugentena pen koute dinga nagen ahiei, ahilouleh, mi jousie a ding?” chin adong hi. Tualeh Topan “A pu in a innsunga thunei a akoi, a hun hun a ann-neh tuidawn pethei, sumkeemthei, pil leh gin-umtah khu koi ahita diei? Ahingpei chieng a khumbanga bawl a apupa’n amupa khu ahampha hi. Dihtah in kahing hil hi; anei-alam jousie tunga vaihawm in akoi ding hi. Hinanleh asuohpan, ‘Kapu hing tung bailou ding ahi,’ chin suoh pasalte leh suoh numeite na vogawp in ne-le-dawn in zu nakham gawp taleh, a gintaatlou ni khat leh atheikhaahlou hun laitah in a pupa ahingtung ding hi. Gin-umloute toh a koikhawm ding hi. Tualeh suohpa khat apu lungsim thei ngaal a zui utlou, tualeh khumbanga naseem utloupa khu nasatah a vuoh in aum ding hi. Hinanleh theilou keei a, vuohtaah zong hiloute khu awl deu a vuoh in aum ding uhi. Tampi pieh a umte kungah tampi phuut in aum ding a, tampi kepsahpa kungah tampi ma phuut in aum ding hi.
