Mark 11:11–26
Tuachin Jerusalem ah apei a, bieh inn sungah aluut hi, bangma jousie a etkiimveel jou in, ni ahing ngiemta a, nuazui sawmlenite toh Bethani ah apeita hi. A zingni a Bethaani apat ahing pei un, agil akielta hi. Tualeh theipi naa pha mama khat gamlapia um amu a, aga aumkhahleh chin a ending in avapei hi. Aphung ahing tunin, anaa loungaal bangma amu sih hi, theipi ga hun ahilou jieh in. Tualeh tua thei phung kungah, “Nang akipat in koiman na ga hing nekia nawnsih hen,” achi hi. Tualeh anuazuiten zong aza uh hi. Khumin Jerusalem ah ahing tung uhi. Tualeh biehinn sungah aluut a, biehinn sunga silzuate leh aleite adeldoh a sumhengte dawkan leh palva zuate tounate akhule pieh hi. Tualeh aman biehinn sunga van popuma luut ding koima aphal sih hi. Khumin aman thuhil kawm in, akung uah, “Ka inn pen nam jousie adinga thungetna inn kichi ding ahi,’ chia kigiel hilou amah? Hinanleh nouten gutate inn na suohsahta uhi,” achi hi. Khumin siempuliente leh laigielten athugen aza ua, ama suh siet nading lampi asui uhi. Hilezong mipi tampiten athugen khu lamdang asah jieh un azau uhi. Nitah ahing hitah in khopi apat apawtdohta uhi.
Ginna nasepthei dan
Zingkaal a ahing suoh kia un, theipikung khu azung tanpha agaw in amu uhi. Khumin Peter in theijing in Jesu kungah, “Pu aw, en in theipi kunga haamsie nalaw khum khu agawta hi,”achi hi. Tuachin Jesu’n tambangin, adawng hi, “Pasian gingta un. Chitahtah in nakung uah kahing hil ahi, koi in zong tami muol kungah, “Tuipi sung ah kituondoh in chin alungsim in ginglalou in um henlen, athunget taangtung dingin gingtatah in umleh ama a ding in bawlpieh in aumding hi. Tuajieh in kahing hil ahi, thu ngetna a, na nget tapou uh, amusa bangin kigingta un, tuachin namu ding uhi. Tualeh thungen dinga na din chieng un, mi tunga na lungdamlouna uh aumleh, ngaidam un, tuachin napa uh van a um in namawnate uh ahing ngaidam ding hi.” Hinanleh na ngaidam sih uleh Napa uh van a um in zong na khelnate uh ahing ngaidam sih ding hi.”
