John 17:1-11
Jesu thungetna
Jesun tam thute agen zou in, vanlam nga in adaah a, “Pa aw, ahun hing tungta, Tapa’n nang ahing pahtawithei nadingin na Tapa pahtawi in. Mi jousie tunga thuneina napiehkhiet apat a, akhut a napiehte kumtawn hinna apiehthei nading hita hen. Khumin amauten nang Pasian dihtah khat maimai leh nasawl Jesu Khrist athei uh kumtawn hinna ahi. Sep dinga nahing piehte ka seemzouta a leitungah na min ka pahtawita hi. Tualeh Pa, tu’n leitung mite ma sanga na kunga thupina kanei, tua thupina toh na mitmu in hing pahtawi in. “Leitunga kipat a kei nahing piehte kungah na min katheisahta, amaute nang a ahi ua, nang amaute ka khut ah nahing pie hi, tuachin nathu azuita uhi. Tun sil jousie kei nahing piehte nang apat a hing kipan ahi chi atheita uhi. Ajiehpen nang ka kunga thu nahing pieh jousie ken amau kapie a, tuate amauten apomta uhi, tualeh nang akipat a hingpei kahi chi thudih atheita uhi, tuachin nang in kei nahing sawl ahi chi agingta ta uhi. Ken amaute dingin thu ka ngetpieh a, leitung mi jousie adingin ka ngetpieh sih a, kei nahing piehte ding maimai in kangetpieh hi, ajiehpen amaute nanga ahi uhi. Kei-ate nanga ahia, nangate kei-a ahi, tuachin amaute lah ah tawi saang in ka umta hi. Tualeh tu’n leitungah ka um nawnsih dinga, hinanleh amaute pen leitungah aum ding uhi, kei nakung hing zuon kahita hi. Asiengthou Pa aw, eigel pumkhat ihibanga amaute zong pumkhat ahithei nading un kakhut a nahing piehte na min in keem in.
