John 12:1–11
Bethani a Jesu thaunamtui kinuna
Jesu’n shina apat a akaithoupa Lazarus umna Bethani ah, peisan pawi ding kuon ni guh aum lai in, ahing haw hi. Tuanah nitah ann ahuonpieh ua, Mari annhuon in apang a, tuachin Lazarus a annkuong iimpi pawl lah ua khat ahi. Tualeh Mari in asieng nard kichi sathau mantam bung khat ahing tawi a, Jesu keeng anupieh a, asam in akeeng te anuulpieh a tua chin asathau gimnamtui in innsung azeelsuoh hi. Hinanleh anuazuite lah a pang Judas Iskariot ama leheeh dingpa in, “Tami sathau namtui dangka zathum a zua a, migentheite hawmpieh ding hizolou amah?” achi hi. Tami thu khu migentheite akhotuo jieh a agen ahisih a, guta ahia, sum-ip keem a asunga kikoite mang zeel mi ahi jieh a, agen ahizaw hi. Jesu’n, “Amanu suhbuoida un! Tuateng khu ka kivuini chienga dingin amanu koisah un. Mizawngte pen na umpi zing ua, keipen um zingtheilou ding kahi,” achi hi. Jiuten Jesu tuanah aum chi athei chieng un, Jesu amunuom maimai hilou in, shina apat a akaithoupa Lazarus munuom kawm in ahingpei uhi. Tuachin siempulienten Lazarus nasan tha asawm uhi. Ajiehpen, ama jieh in Jiumi tampikhat in Jesu agingta ua, eite ahing taisan uhi.
