John 8:21-30
Sietna hingtung ding thu agenna
Tualeh akung uah, “Peimang ding kahia, tuachieng nouten na hing sui ding uhi, tuachin na mawna utoh nashi ding uhi, Ka peina lam ah nahing peithei sih ding uhi,” achikia hi. Tuachin Jiuten ama-le-ama kithat ding khat ahi amah, “Ka peina ah hingpei theilou ding nahi uh achi mawh?” achi uhi. Jesu’n akung uah, “Noute nuoilam a pieng nahi ua, Keipen tunglam a pieng kahi hi; noute tami leitung a nahi ua, keipen tami leitunga kahisih hi. Na maw nate jieh un nashi ding uhi chi kahing hil nahi uhi, ajiehpen nouten kei ama kahi chi na gintaatlou uleh na khelnate jieh un nashi ding uhi,” achi hi. Khumin amauten Jesu kungah, “Nang koi nahiei?” achi uhi. Jesu’n akung uah, “Achiil apat in nakung uah kagen zouta hi. Natungtaang thu uah gen ding kahau a, hawm ding tampi kanei hi; banghitaleh, ama kei hing sawlpa khu midihtah ahi; ama apat a ka thute mi jousie kungah kagenkhie hi,” achi hi. Pa tungtaang thu akung ua, agen ahi chi amauten athei thei sih uhi. Tuachin Jesu’n “Kei ama kahi, tualeh ken keima utthu in bangma kabawl sih a, hinanleh Pa in ahing hilh bangbangin thu ka genzaw hi chi nahing thei ding uhi. Tualeh ama kei hing sawlpa khu kei toh umkhawm kahia; alung deilam ka bawl zing jieh in aman ka ngentang in ahing nuasie sih hi,” achi hi. Tua chia thu agen lai in mitampi’n a gingta uhi.
