JOHN 11:1-45
Mari leh asanggamnu Martha umna Bethani khuo a um Lazarus kichi damlou in aum hi. Topa thau namtui nu a, asam a akeeng zuutnu khu Mari ahia, tuanu sanggampa Lazarus ahia, damlou in aum hi. Tuachin asanggam numeiten Jesu athuta ua, “Topa na itpa damlou in aum hi,” achi uhi. Hinanleh Jesu’n tami thu azaah bep in, “Tami natna pen shi nading lieng a natna ahisih hi, Pasian thupi nading ahizaw hi. Tami nasepna jieh a, Pasian tapa tawisaang a aumthei nading ahi,” achi hi. Jesu’n a it Martha leh asanggamnu tualeh Lazarus ahi uhi. Tuachin adamsih hi chi thu azaah in, aumna ah nini ataam nalai hi. Khumin tamte zou in Jesu’n anuazuite kungah “Judea gam ah vapeikia vai,” achi hi. Anuazuiten akungah, “Siepa, tuma deu in Jiuten suonga se ding in ahing sui ua, nang lah khuna hawkia nasawm a?” achi uhi. Jesu’n, “Sun hunsung naikaal sawmleni um hilou amah? Koizong sunlai a avaah leh, tami leitung khovah amu jieh in, akisukha ngaisih hi. Hinanleh mi koizong zanlai a avaah leh, vah aneilou jieh in akisuikha zing hi,” chin adawng hi. Tua thute agen a, tuazou in akung uah, “I lawmpa uh Lazarus a iimuta a, tuajieh in aphong dinga peiding kahi,” achi hi. Nuazuiten akungah, Topa a iimu ahileh, ana hoi nading hi,” achi uhi. Jesu’n Lazarus ashina thu agenna ahia, hinanleh amauten a iimu maimai hidinga angaituo uh ahi. Khumin adihtah ahil a, “Lazarus ashi ahita hi, Tuana ka na umkhaahlou noute jieh in kakipah hi, tuachin nagintaatthei nading un, bang hitaleh akungah vahaw vai,” achi hi. Akoppien kichi Thomas in anuazuipite kungah, “Ei zong ama toh shi khawm ding in vahaw va ui,” achi hi. Tuachin Jesu ahing tunbep in, Lazarus haan sungah ni li ana umta chi athei hi. Jerusalem khogei a um Bethani khuo pen tai ni ahia, Jiute mi tampi Martha leh Mari kung ah, asanggampa shina tunga heneem dingin ahing haw uhi. Jesu ahing pei hi chi Martha in azaah bep in, Mari innsung aumlai in avakimupi hi. Khumin Martha in akungah, “Topa aw, nang um lachin ka sanggampa shilou ma ding hiven, tu’n zong Pasian kunga nanget pouma Pasian in ahing peding chi kathei hi,” achi hi. Jesu’n akungah, “Na sanggampa a thoukia ding hi,” achi hi. Martha in akungah, “Nitawpni chiengin thawkia na ah athoukia ding hi chi kathei hi,” achi hi. Jesu’n akungah, “Kei thawkia na leh hinna kahi, koizong kei hing gingta khu shi nanleh ahingkia ding hi, tualeh koizong hing nalai a hing gingta khu ashi nawnsih ding hi. Tam thu nagingta eimah?” achi hi. Amanun akungah, “Hina, Topa, nang Khrist Pasian Tapa leitunga hingpei nahi chi kagingta hi,” achi hi. Tami thu agenzou in, avapei a, a sanggamnu Mari kungah, “Siepa ahing tung a nang ahing haan hi,” avadap chi hi. 29 Amanu’n tami thu azaah bep in, kintah in akisa a, akungah apeita hi. Jesu khosung ahing luutnai sih a, Martha in ava kimupina ah aumnalai hi. Inn sung a ama heneem a um Jiu ten Mari kintah a kisa a pawtkhie amu chieng un, haan lam a vakap dinga pei hiva chin anuazuita uhi. Khumin Mari Jesu umna ahingtun in, Jesu keengbulah akhupboh a,“Topa nang um hilachin ka sanggampa shilou ma ding hiven,’ achi hi. Jesu’n amanu leh ahingpeipi Jiute kaa amu bep in, a nahngehgu ana a alung akhoi mama hi. Khumin “Heia na vui uh ahiei?” achi hi. Amauten akungah, Topa hing pei inlen, hing en in,” achi uhi. Tuatah in Jesu akapta hi. Tuachin Jiuten, “En un, a it mama hi!” achi uhi. Hinanleh alah ua khenkhat in, “Tam mittopa mitvahsahtheipa’n tampa zong shilou a koitheilou amah?” achi uhi. Khumin Jesu alaina mama a, haan ah ahing tungta a, tua haan suongkohawm ahia, suonga kisiin ahi. Jesu’n, “Suong khu domkhie un,” achi hi. Martha, ashipa sanggamnun, “Topa ashi kalsie ni li phata, uita va,” achi hi. Jesu’n akungah, “Nagintaat leh Pasian loupina namu ding kahing chi hilou amah?” achi hi. Tuachin suong khu adomkhie ua, tualeh Jesu’n vanlam a en a, “Pa kathu na ngai khieh jieh in lungdam thu kahing gen hi. Bangchih laipou in, kathu na ngai khe tawntung chi kathei hi, hinanleh tam mipi ka kiim a dingte jieh in kahing gen hi, amauten kei nang hing sawl kahi chi agintaatthei nading un,” achi hi. Tamthu agenzou in, aw ngaitah in akikou a, “Lazarus hing pawtdoh in,” achi hi. Mishipa khu ahing pawt a, akhut leh akeeng haan puon a tuom in aum a, amai zong haan puon in akituom hi. Jesu’n akung uah, “Phel unlen, peisah un,” achi hi. Tualeh Mari toh hingpei Jiute khenkhat in asilbawl amu ua, agingta uhi.
