John 7:40-53
Khumin tam thute azaah chieng un, mipi khenkhat in, “Tampa guolnei tahtah ahi hi,” achi uhi. Midang khenkhat in, “Tampa Khrist ahi hi,” achi uhi. Hinanleh khenkhat in, “Khrist kichipi Galili gam ah ahing pieng ding amah? Laisiengthou thu in David umna Bethlehem khuo akipat in David suon ah Khrist khu hing pieng ding ahi chi hilou amah?” achi uhi. Tuachin ama tungtaang thu jieh in mipite akikhenta uhi. Amaute lah a mi khenkhat in mat a ut ua, hinanleh koiman atunga khut ahasih uhi. Tuachin vaisaite siempuliente leh Pharisaite kungah akinuale ua, amauten akung uah, “Bangdinga hing puilou nahi uh ahiei?” achi uhi. Vaisaiten, “Tampa banga thugen koima a umsih hi,” chin adawng uhi. Pharisaiten akung uah, noute zong solh a va umdoh dan nata uh amah? Vaihawmte leh Pharisaite ama gingta a umkhata uh amah? Hinanleh tampi dantheiloute pen awse lawkhum ahi uhi,” chin adawng uhi. Amaute lah a mi Nikodem, tu masanga akunga vahawpa’n akung uah, “Ama kamsung ngeel a athu izaah leh asilbawl imu masang in i dan un mi tungtaang vai ahawm ngai amah?” achi hi. Amauten akungah, “Nang zong Galili gam a hing kipan namah? Galili gam ah guolnei apiengngai sih chi sui lachin theivateh,”achi ua, adawng uhi. Khum in mi jousie a innlam chiet uah apeita uhi.
