John 9:1–41
Mittosa a pieng
Tualeh lampia apeilai in, apien apat a mitto khat amu hi. Khumin anuazuiten, “Siepa tampa mittosa a apien anu leh apa ahisihleh ama mawna jieh amah?”chin adong uhi. Jesu’n akung uah, “Tampa mawna jieh ahisihleh anu-le-pa mawna jieh ahituom sih hi, Pasian sil bawl atunga akitahlatthei nading ahizaw hi. Sun ahi lai in ama kei hingsawlpa naate isep ding uh ahi; zan ahing tungkhielta a tuahun chieng in koiman naa aseemthei nonsih ding hi. Leitunga ka um laisie leitung khovaah kahi hi,” chin adawng hi. Tam thu agenkawm in, tuollah achil asie a, achil sietna leivui khu buon in asiem a, tua buon in mipa mit khu anoipiehta hi. Khumin akungah, “Pei inlen Siloam tuikhuuh ah namai vaphietta’n” (Siloam chipen Sawl china ahi), chin avapei a, avaphiet a, amuthei in ahing kinualeta hi. Tualeh a innvengte leh nidang a khutdaw a namu ngaiten, “Tampa hilou amah chi mun khat tenga natou a khutdaw zing?” achi uhi. Pawl khat in, “Ama hina” achi ua adang in “Hi laizang sih akisutpi hibou,” achi uhi. Tualeh aman, “Tuapa kahi hi,” achi hi. Amauten akungah, “Ahileh namit bang hing chi vathei ahiei?” achi uhi. Aman adawnga,” Jesu kichipa in buon ameeh a, tualeh kamit ah ahing nuoipieh a, kakungah, ‘Siloam tui ah va phiet ta’n,” achia, tuachin kei zong kapei a, kavaphiet a tuachin kamuthei ta hi,” achi hi. Amauten akungah, “Heiah aum tai?” achi ua, aman, “Theising,” achi hi.
Khumin nidang lai a mittopa Pharisaite kungah apuita uhi. Jesu’n buon ameeh a, amit avahsah ni pen khawlni ahi. Pharisaiten akhomuthei dan bang achi mu ahiei chin adong kia uhi. Khumin aman akung uah, “Kamit ah buon anuu a, ka vaphiet a, tuachin kamu mai hi,” achi hi. Pharisai khenkhatten, “Tamipa’n khawlni anitlou jieh in, Pasian apat a hing pieng hisihva,” achi uhi. Hinanleh khenkhatten, “Mi tawnkhielten tua bang sillamdang abawlthei ding amah?” achi uhi. Tuachin amaute akilangkhenta uhi. Tuachin amauten akungah, “Namit avasahta a ama bang hiva nachiei?” chin adongkia uhi. Aman, ‘Guolnei ahi’ achi hi.
Hinanleh Jiuten amapa mitto ahia, khuo amu ahita chipen amitvahpa nu leh pa ahat masangsie un, atahsangthei sih uhi. Khumin anu leh pa kungah, “Tami na tapa uh apien apat amit tosa nachi uh khu ana amah? Bangchi dan a, tua hing muthei ahiei?” chin adong uhi. Anu leh apa’n “Tami ka tapa uh, apien apat a mitto ahi; hinanleh tua bang achi mu ahiei chi kouten kathei sih uhi. Apiching khat ahita a, ama dong ulachin ama tungtaang thu ahing kigen ding hi,” achi uhi. Anu leh apa’n tami agen uh Jiute agiin jieh uh ahi, ajiehpen koizong ama khu Khrist ahi chia gen pouma kikhopna inn apat a nawkhiet ding ahi chin Jiu ten kithukimna khat aneisa uh ahi. Tuajieh in anu leh apa’n, “Apiching ta hi, ama kidoh un,” achi uh ahi.
Tuachin anivei nading in mittopa ahaan ua, akungah, “Pasian pahtawina pezomai in: kouten tampa mikhiel ahi chi kathei uhi,” achi uhi. Aman akung uah, “Tawnkhiel ahileh hilou lamsang bangma thei kha sing; thei khat maimai nei ing, tua khu nidang in mitto in na um nanleng tu’n vang khuo kamuta hi,” chin adawng hi. Amauten akungah, “Aman natung a bang ahei abawl? Namit bang achi vahsah ahiei?” achi uhi. Aman akung uah, “Kagenzouta hi, na ngaikhiet noplou uh ahi. Bangdinga na zaahnuom sawnsawn uh ahiei? Awle, nou zong anuazui hi ding na ut uh amah?” achia, adawng hi. Tualeh amauten achiukawh ua, “Nang anuazui nahi, kou Mousi nua zui hibou ung. Pasian in Mousi ana houpi hi chi kathei uhi, hinanleh tampa tungthu heia hing pieng amah chi thei sih ung,” achi uhi. Aman akung uah, “Tami hilou amah alamdanna! Apienna lah na theisih ua, hinanleh aman kamit avasah hi. Pasian in mikhielte angaikhe sih a, hinanleh Pasian beten adeilam abawl uleh, ama khu Pasian in angai khie hi chi ithei uhi. Leitung kisiem chiil apat in apien apat a mitto damsah koima akitheikha naisih hi. Tami pa Pasian apat a pienglou hileh bangma bawltheilou ding ahi,” achia, adawng hi. “Nang mikhiel sunga pieng in, koute hing hil ding namah?” chin adawng uhi. Tualeh amauten amapa anotdohta uhi.
Jesu’n ama anotdohta uh chi athei a, tuachin asuidoh a, akungah, “Mihing Tapa na gingta amah?” achi hi. Tualeh aman, ‘Ahileh pu ka gintaatthei nadingin ama koi ahiei?’ chin adawng hi. Aman akungah, “Ama namuta a, nakunga thugenpa khu ama ahi,” achi hi. Khumin “Topa ka gingta hi,” achia; tuachin abeta hi. Khumin Jesu’n, “Mit a khomulouten khuo amuthei nading uleh, mitkhomute amit uh ahing tawtthei nadinga vaihawm dinga, tam leitunga hingpei kahi,” achi hi. Akungnai a um Pharisaite khenkhat in athugen aza ua,“Koute zong amitto kahi uh amah?” achi uhi. Jesu’n akung uah, “Amitto hi ulachin mawna neilou ding nahi uhi, hinanleh tu’n ‘Ka muthei uhi’ nachi ua, na mawna uh aum hi,” achi hi.
