Matthew 18:21-35
Khelnate ngaidam ding
Tua hunlaitah in, Peter ahing pei a, akungah, “Topa ka sanggampa ka tunga agamtatkhelna bangja vei ka maisah diei? Sagi vei dong in ka maisah diei?” achi hi. Tualeh Jesu’n akungah: “Sagi vei dong ka chisih a, sagi vei sawmsagi vei dong in ka chijaw hi.”
Ngaidam dan theilou suoh gentena
“Tuajiehin vangam khu leengpa koi ahiei in, asuohte toh adangka tuot sieng ding a kisatoh akigentethei hi. Sum aphultah in, talent tulkhat bapa akungah ahing jawpi ua, tualeh adit nading aneilou jieh in, apupa’n tuamipa leh azi atate, tualeh anei alamte zua henlen, dinkiata hen chin asawlta hi. Tualeh asuohpa in: “Mangpa ka tungah zangai tadi’n, aun in kahing pekia ding hi,” chin amaiah akhupboh a azawlta hi. Tuachin tua suohpa mangpa’n akhotuo a, ahakhie a, abat jousie amaisahta hi. Hinanleh tua suohpa apawtkhie a, asuohpite lah ah khat sum zakhat bapa kungah avahaw a, angawng ah aman a, “Na bat hing sangin,” chin atawlmeehta hi. Asuoh hipipa’n, “Ka tungah zangai ta di inlen, hing sang navang,” chin abohkhup a angenta hi. Hinanleh a utsih a abatteng asanjou masang in thong ah akhumta hi. Asuoh hipitengin agamtatnate amu chieng un, alungkhamta ua, agamtatnate amangpa uh ahilta uhi. Tuachin a mangpa’n ama ahaan a, akungah: “Suohgilou, nahing nget vanguut jieh a na bat jousie ka maisah hilou amah? Kahing khotuo mabanga nang zong na suohpite na khotuo ding hi lou amah?” achita hi. Tualeh a mangpa alungthah a, aleibatte asanjou masang sien, migiloute amansahta hi. Mi jousien na lungsim sung ua na sanggamte uh na ngaidam sih uleh, van a um, ka Pa’n tua mabangin natung uah abawl ding hi,” achi hi.
