John 4:5-42
Tuachin Samaria khopi Saikar kichi, Jakob in atapa Josep apiehna gam kung ahing tunga, tuanah Jakob tuikul khu aum a, Jesu zong khuolzin gim ahijieh in tuikul gei ah atouta hi. Tua hun khu sunkim veel ahi. Khumin Samaria numei khat tui tawi dingin ahing kuon hi. Jesu’n akungah, “Dawn ding tui hingpie’n,” achi hi. Ajiehpen nehding lei in anuazuite khopi lam ah apei siengta uhi. Samaria numeinun akungah “Bangchidan ahiei, nang Jiumi’n Samaria numei kei kunga dawn ding na nget?” Jiuten Samarite khut na zah ngailou uh ahi. Jesu’n, “Pasian silpieh leh ‘dawn ding hing pien,’ nakunga hing chipa thei lachin, akunga na nget zawh ding hia; tuachin aman hinna tui hing pe ma ding hiven,” chin adawng hi. Numeinu’n akungah, “Pu aw, atawi na ding bangma lah nanei sin, tuikul lah athuuh mama a, heisunga tuami hinna tui khu lading nahiei? Kapu uh Jakob saanga thupizaw namah?Aman tuikul ahing pie a, tuanapat in ama leh atate leh aganhingten adawn uhi,” achi hi. Jesu’n akungah, “Koipou tami tui dawn pouma adangta kia dinga, hinanleh ken ka pieh ding tui dawn pouma pen adangta nawnsih ding hi; ka tui pieh ding in asung ah tuinah anei ding a, kumtawn hinna tan in apuul zing ding hi,” achi hi. Numeinun akungah, “Pu aw, kadangtah nawnlou nading leh tana tuitawi a ka hing pei nawnlou nadingin, tua tui khu hing pien,” achi hi. Jesu’n akungah, “Napasal vahaan inlen, tanah hingpei kia in,” achi hi. Numeinu’n,“Pasal kaneisih hi,” chin adawng hi. Jesu’n akungah, ‘Pasal kaneisih hi,’ nachipen nagendih hi; pasal nga naneita a, tua zong na pasal hilou ahi; tami nagen khu nagen dih hi,” achi hi. Numeinu’n akung ah, “Pu aw, guolnei nahi chi katheita hi. Kapu kapate un tami muol tung ah Pasian abie uhi, ahin nouten Jerusalem vateeh ah miten Pasian abieh ding uh ahi,” nachi uhi. Jesu’n amanu kungah, “Numei aw, kei hing gingta in; tam muoltung leh Jerusalem vateeh hilou in Pa nabieh hun ding uh ahing tung ding hi,” achi hi. Nouten na theiloupi uh nabie ua, kouten ahileh ka theima uh ka bie uhi; ajiehpen Jiute apat a hundamna hing kipan ahi. Hinanleh ahun tungding hita, tuma ma’n zong atung hita tuachieng in Pasian dihtah a beten hagau leh thudih in abe ding ua, ajiehpen tuabang mite Pa in ama be ding in asui hi, Pasian khu hagau ahia, abeten hagau leh thudih a abieh ding uh ahi,” achi hi. Numeinu’n akungah, “Messiah (Khrist kichi khu) hingpei ding ahi chi kathei hi. Ama ahing pei chiengin bangkim ahing hil ding hi,” achi hi. Jesu’n akungah “Keima na kunga thu genpa khu ama kahi,” achi hi. Tuahun laitah in anuazuite ahingpei uhi. Amauten numei khat toh akihou lamdang asa ua, hinanleh koiman, “Bang ahiei nadei? Bangjieh a amanu toh kihou nahiei?” achi sih uhi. Tuabep in numeinun atui beel ataisan a, khopi lam ah ava pei a, tuachin midangte kungah, “Hing pei un, ka silbawl jousie hing genthei mikhat hing en un; Khrist khu ahi diei?” avachi hi. Khumin amaute khopi apat in ahing pawt ua, ama lam azuonta uhi. Tuakaal in, anuazuiten akung ah, “Siepa aw, ann ne in,” chin azawl uhi. Hinanleh aman akung uah, “Na theilou uh ann nehding kanei hi,” achi hi. Tuachin anuazuite aki dongtuo ua, “Mi khat ann hing tawi um amah?” akichi uhi. Jesu’n akung uah, “Kei hing sawlpa deilam bawl leh anasep ding pen ka ann ahi. Nouten, ‘Bu laah nading hali um nalai, nachi uh hilou amah?’Kahing hilh nahi uhi, khodaah unlen, en un, lou a bute laahding in amin siengta hi. Alaten sepga amu ding ua, kum tawn hin nading in ga akhol ding uhi, tuachin atute leh alate akipah khawmthei nading uh ahi. Ajiehpen khat in atu a, mi dang khat in aki aat hi ana kichipen tanah adih hi. Na seplou keei uh aat dinga kahing sawl nahi uhi;midang in naa aseem ua, nouten asepsa mabaan uh nakitawi hiau uhi.” Khumin numeinu in,“Ka silbawl jousie ahing genkhie hi,” chia thu agen jieh in khopi a hing kipan Samaria mi tamtah in ama agingta ta uhi.’
Jesu leh Samarite
Tuachin Samarite akunga ahing tun un, akung ua, taam dingin azawl ua, tuachin tuanah nini ataamta hi. Tuachin athu gen jieh in mi tampikhat in agingtata uhi. Amauten numeinu kungah, “Na thugen jieh a kagintaat uh ahi sih a, kouma ngeel in athu kazata ua, tualeh tampa leitung Hundampa ngeel ahina chi katheitah jieh ua ka gintaat uh ahizaw hi,” achi uhi.
