Matthew 20:17-28
Jesu Jerusalem khuo a apeilai in, anuazuite atuom in ajawpi a, lam apei lai un, akung uah: “Ngai un, Jerusalem juontou ihi ua, Mihing Tapa khu siempuliente leh laigielte khut a pieh in aum ding hi; tualeh amapen shi dingin atungah thu atan khum ding uhi. Apmai bawlna’n anei ding ua, vuoh leh sat thuoh in, singlamte a kilbeh dingin Jentelte kungah ape ding ua, tuachin anithum ni’n athou ding hi,” achi hi.
Leitung a thupi ding ngetna
Tuajou in, Zebedi tapate nu atapate toh akungah ahing pei ua, a maiah akhupdin a, sil khat angen hi. Aman akungah: “Bang dei na hiei?” achi hi. Amanu’n akungah: “Na gam ah katapate geel khat na zietlam ah khat na veilam a tou dingin thupie in,” achi hi. Jesu’n adawnga, “Na nget pen na theisiem sih hi, ka nou dawn ding na dawnthei nading uoi?” achi hi. Amauten akungah: “Ka dawn thei ding uhi,” achi uhi. Aman akung uah: “Ka nou khu na dawnding ua, hinanleh ka ziet leh ka veilam a touna dingpen kei pieh ding ahisih a, ka Pa’n aguotsate ding ahijaw hi,” achi hi. Tualeh sawmten tam thu ajaahchieng un, sanggamtegeel tungah alung thahta uhi. Hinanleh Jesu’n amaute ahaan a, “Jeltelte tunga vaihawmte atung uah alien uhi. Amiliente un atung uah thu anei uhi chinathei uhi. Hinanleh noute lah ah tuabang ding ahisih hi. Noute lah a milien hinuom pouma na naseem un apang ding ua; tualeh na lah ua amasapen hinuomte nasuoh un apang ding uhi; Mihing Tapa nangawn miten ama naa asep piehding a hingpei ahisih a, mite naa seem ding, mi tampi hundam ding leh ahinna pedinga hing pei ahijaw hi,” achi hi.
