Mark 5:21-43
Jairus tanu akaithouna leh numei siluong adamsahna
Gunkuong a tuongin Jesu gaalkhat lam ahing kai kia chiengin, tuipi geiah auma, mipi tampi akungah ahing kikhawm uhi. Amin Jairus kichi kikhopna inn a lamkai khat ahingpei a, Jesu amu bep in, amai ah akhupboh a angenta hi,“Ka tanu neunou shi ding khawp in ana a, hingpei inlen atungah na khut hing ngam in, tuachin adam dinga, ahing ding hi” achi hi. Khumin ama toh apeikhawmta uhi. Tualeh mipi tampi khat in anuazui a, akiim aveel ah adim in apei uhi. Khum nah numei khat kum sawmni leni siluong khat aum hi. Amanu’n zatou tampi khutnuoi ah gimtah in a na thuoh a, aneisunteng abeita a, phattuomna neilou in, akhoh seemseem hi. Jesu tungtaang thu ana zakha a, mipi lah a anua hing zui in, apuon mong akhoita hi. Ajiehpen amanu’n “Apuonmong khoileng ka dam ding hi,” achi hi. Tuazouin, asiluon pen akangpai a, anatna dam in akithei pai hi. Tualeh Jesu’n athuneina ama akipat apawtkhiet atheia, thakhat in mipi lam nga in akinuahei a, “Koi ahiei ka puon hing khoi?” achi hi. Tualeh anuazuiten “Na kiimveelah mitampi uma, hing kinawhkha ahi ding hi, bangchia ‘Koi ahiei ahing khoih?’ na chi ahiei.” Tualeh aman koipen ahiei chin a enkawi kawi hi. Tuachin numeinun atunga sil um hoitah athei jieh in, zau a kithing kawm in ahingpeia, amaiah akhupboh hi. Tualeh thudih agendohta hi. Tuachin aman akungah, “Tanu aw, na ginna in ahing damsahta hi. Na natna apat in dam inlen lungmuong in peita’n,” achi hi. Tualeh thu agen laitah in, lamkaipa inn apat in mi ahingpei ua,“Na tanu ashita hi, bang dingin siepa buoisah nalai ding namah?” achi uhi. Hinanleh Jesu’n athugen uh azaahjou in, kikhopna inn a lamkaipa kungah, “Jau sinlen, ginna nei in,” achi hi. Tualeh aman Peter, James leh anaupa John loungaal koima dang anuazui dingin aphalsih hi. Kikhopna inn a lamkaipa inn ahing tun in, mipi husan leh kaana aw aza uhi. Tualeh inn sunga ahing luut in, akung uah, “Bangdinga kap a buoi veng-vung nahi uoi? Naupang pen ashi ahisih a, a iimu ahibou hi,” achi hi. Khumin amauten anuisat uhi. Adangte inn maiah apawtsah a, naupang nu-le-pa, tualeh azawpite toh naupang umna mun ah aluut uhi. Naupangnu khu akhut ah tu in “Talitha kumi,” akhietna ahileh, “Naupangnu aw, thou in kahing chi hi,” chin agen hi. Tualeh thakhat in naupangnu ahingthou a, avaahpai a, amanu kum sawmleni ching ahita hi. Khumin a unpi un lamdang asa mama uhi. Tualeh aman tami koima natheisah vawtlou ding uh ahi chin athuchiem a, “Amanu aneh ding pie un,” chin agen hi.
