Asia Gamkaipi a Federation of Asian Bishops’ Conferences (FABC) in Thutan Kikupna (Plenary Assembly) asawm-le-nina mang dingin akiguong panta ua, tami kipawlna a lutang Pu Cardinal Felipe Neri Ferrao, India tumlam a Goa leh Damao a Archbishioppa’n kikupna a lui ding thu leh la guol panta. Tam kikupna leh thutanna ah ama’n mipite zong hing pang henlen, Pasian nasept ding dan leh mipi toh kikum zing pawlpi ihi nadinguh kikum vai achi hi.
Ahing tung ding July 20-26 kikal ah kikupna aum dinga, Indonesia Khuopi Jakarta ah akimang ding hi. Thupi ahileh “Asia a mipi pangkhawm a kisiemthana leh Pasian nasep nadinga lei leh leidawte ihina nadinguh” chi’n thu azeh panta uhi. Asia Gamkaipi a siempupite ahing toukhawm ding ua, Asia a Pasian nasep guol dingdan leh Asia a theilou kal a kikhel tawndan, khuo leh tui kiheidan, nei leh lam suina leh biehna tuomtuomte umtandan akikum ding uhi.
Radio Veritas Asia (RVA) leh Pu Cardinal Ferrao kikal a doh leh dawnlimna ah ama’n tami kikupna hi tuhun a dinga sil poimaw khat ahia, tami kikupna ah Asia a Pasian nasepna hing kikhel lamdang va chi’n akinem hi.
Tami Thutan Kikupna ah FABCte’n bang hing puodoh va nachi uoi?
Hichia siempupite kikupna hi kum li ah khatvei akimang giap a, Asia a siempupite kikupna ahia, Asia a sil kikhel lamdangte tungtangah bang panmun ila ding uoi chi’n akikumkhawm ding uhi. Thupi toh kisai in John 1:50: “Tam sanga thupi zaw sil lamdang na mu ding hi” akiteldoh hi.
Asia leh tam gamkaipi pam a khuo leh tui kikheldan, vaitai galtai dan, nei leh lam kikhietna, khuohui buoina leh biehna tuomtuom kibelapna tungtang akilui dinga, Asia a Pawlpi in bang chibangin kilemna, hamuonna leh mihing kihoutuona ipuodoh thei diei chi’n akikum ding uhi.
Tulai pawlpi hi mipi panlahna pawlpi ahita a, tam jieh in pawlpi in mihing ahing lem thei jel hi. Gungal leh gungal lei toh ikawm bangun, pawlpi zong lei ahi angaia lei adaw be ding akisam hi. Hichi’n Asia mite ahing kinai deu ding ua, khat leh khat ahing kikawm ding ua, ahing kihoutuo panta ding uhi. Tam nasep hi Asia pam a zong itut dinguh ahi.
Tami Thutan Kikupna ah Pu Cardinal Filipe Neri Ferrao in tua kipan in pawlpi in mipite hing tawisang va, tualeh Pasian nasep ahing tuom deu va, pawlpi midang toh kihou thei pawlpi hing suoh va chi’n akinem hi.
