Asia gam a Khristien khotangte hasatna tuohte in kihouna leh kilemna siem dinga Pawlpi kipiehna khu a thuh jo ding ahia, kiemsah ding ahisih hi, chi’n Cardinal Filipe Neri Ferrão in July 20 a Federation of Asian Bishops’ Conferences (FABC) a 12 veina Plenary Assembly hawnna press conference ah agen hi.
Asia gam bangza heikhat ah Khristiente'n minority hinkhuo mangte hasatna atuoh tungtang thudawhna dawng in Cardinal Ferrão in dinmun hasa tah kawmkal ah Pawlpi in a mission khu apeipi zing nalai hi chi agen hi.
"A khang tangthu jousie ah Pawlpi in dinmun hasa tah tah ana tuoh let ahi. Asia gam mun tamtah in Pawlpi hi dinmun hasa tah ah ahing zing nalai hi chi adih hi," chi’n Cardinal Ferrão, Archbishop of Goa and Daman leh FABC President in a gen.
Jauna leh kituomse na toh dawng lou in Pawlpi in kizawpkhawmna siem a kihoukhawmna toh masuon dingin akipieh zing bangin akipie nalai hi, achi hi.
"Tami jieh tah in Pawlpi in kizawpna, kihoukhawmna, kilemna siemna dingin mawpuohna anei ahi," achi hi.
Cardinal Ferrão in tami mission hi Asia khomuol ah a poimaw mama hi chi’n agen a, sakhuo, hindan/tawndan, ham leh pao tualeh nam tuom tuomte umna gamkaipi ah a poimaw mama hi achi hi. Tuabang dinmun ah Pawlpi khu ginna leh nam dang mite toh kimu nading mun siem dinga hat ahi a, tuaban ah Pawlpi khu ginmawna neia enthei tute toh zong kimu nading mun siem dinga jong hat ahi achi hi.
"Apawt thei Pawlpi hina dinga iki piehna u khu i namdet kia uhi. Mijousie tualeh ginna ikibahpi loute leh ginmawna mit a ei ente toh kitheisiemna lampi isiem a ngai hi," achi hi.
A thugenna ah FABC Plenary Assembly a 12 veina thupi, " Asia a mipi pangkhawm a kisiemthana leh Pasian nasep nadinga lei leh leidawte ihina nadinguh" chi a tahlang ahi. July 20 akipat a 26 tan Jakarta a kalkhat sung kimang ding kikhawppi na ah FABC a member 22 umna bishop conference leh ecclesiastical jurisdictions pan in cardinal leh bishop 120 vel atel hi.
Dawh leh dawnna hun kiman na ah Asia gam pum a Khristien nam neujote maituo ding sil dihtah khu Pawlpi in a pastoral sunga adawn thei ding dan a ngaituo ahi. Cardinal Ferrão in khuchibang sil tah tah te’n Pawlpi a kiemsah ding hilou a, tua sanga kihoukhawmna, kitheisiem tuona leh kilemna zanga Pasian Thuhoi Thupha hil dinga akihatna khu anamdet kia ngai ahi, achi hi.
Assembly tungtawn in Asia gamkai sungah mipi pangkhawm a kisiemthana leh Pasian nasepna hatsah nading lampi poimaw tah tah asui lai un thungetna te, Hagau a kikhelnate, regional meeting te leh communal discernment te anei ding uhi.
Cardinal Ferrão in Asia gam a Pawlpi gintat khu dinmun hasatah pan a potdoh ding hilou a, mipi lah a umzing a, kitheisiemna masawn ding tualeh chi tuom tuomte toh kikhen thang lou a khotang kinepna akinepna lei siemte hi ding athupi jo ahi achi hi
