Puonbuh awng zing

Puonbuh awng zing

PressNote2 24th February 2023

Kipatsahna Mass Siengtho ah Pu Archbishop Tarcisio Isao Kikuchi SVD, alamkaia, ama ahileh Tokyo Archbishop ahia, tualeh FABC ah zong Secretary General in apang gige hi.

Ama ziet leh vei ah Pu Virgilio Cardinal do Carmo da Silva, SDB, Dili a Archbishop leh Pu Louis Cardinal Marie Ling Mangkhanekhoun, Vientiane, Laos Gam a Apostolic Vicar ading gel hi.

Mass sunga athuhilna ah Pu Kikuchi in Africa Gamkaipi a Pasian nasem a apanlaia ana mukhiette asut a, kinepna bei leh kinlana a iop chiengleh,

mihing hagau suhsiet in aom a, ahi’n kinepna leh itna opna ah ‘The Magic of Ghana’ kichi ahing op thei gige hi. Tam in kipahna leh mihing kipumkhatna atut hi.

(The Magic of Ghana=Ghana ah koima akipam koi ngaisih a, panpina deigaw tapo, akipanpi gige hi).

Mass Siengtho akilop jo in, Khuoimeivahte (Candles) kipawlna a lamkaite akipie a, amahaw’n dawkang tungah ata uhi.

Tana khuoimeivah tangte in Khrist Khuovah ahina etsahna ahia, tami khuovah in Zawkhawmna (Synodal journey) sungah lungpilna leh lungsim navahna hing guonta heh china ahi.

Pu Mario Cardinal Grech, tami Synod a Secretary General in, kipatsahna thu agen a, ahing pang josie kungah

‘Tami Zawkhamna ah iunpi sil khat zil ihi uhi’ achi hi. Pawlpi aw ngai vai in kihanthawnsah vai, awsie, aw ging leh agingloh, ‘tualeh aginngamlohte’ ngai pieh vai achi hi.

Hichi’n hanthawna thu agenkia a: “Ppawlpi kikupna ichi khu, mi thugen ngai vai china ahi.’ Tuajieh in pang chiet vai in, pawlpi mite aw zahpieh vai in ei tote, pawlpi mi ihina dawl ah, mipite aw ngai vai achi hi.

Mipite leh tote apanton angaia, amahaw kikal ah kidemna lungsim vawtsih heh chi’n zong hanthawn thu alui hi. Mipi hilei, tote hilei, ipanton dinguh kisam mama tualeh imawpuohna chiet uh ipuoh ding zong kisam mama achi kia hi.  Cardinal Grech in hichi’n athugen abelap kia a: “Pawlpi khat kikupna a mi josie aw kizahna ah, Pasian mipite’n amuolsuo atam a, Khrist thumavang gen ahina atangtung hi. A thukhumna ah Cardical Grech in thungai sil poimaw mama khat in akoi hi. Pawlpi thuhil zing Hagau Siengtho aw ingai zing uh ahi, tualeh a zawhkhawm pawlpi ichi uhi, thungai pawlpi ahi. Hichi’n Athokia Topa Hagau hatna angen a, Topa Hagau in tu kum tulthum sung in tana kikupna a hing pangteng guolawlta hen chi’n thu anget lu hi. Topa Hagau in tami Zawkhawmna ah Topa sielsa lampi ei tuonsah henlen, tami lampi ei kihonpieh zui chiet vai achi hi.

Tuaban in Lie Christina Kheng, Commission on the Methodology for Synod a lamkainu in tutan in heisung igeita uoi chi’n thu alui hi. Amasa pen, tana hing pang josie, panmun la ihi ua, agal et ihisih uhi achi hi. “Tami Zawkhawmna toh kisaia kikupna ahilen, laidal tampi khat sungah thu leh la tampi khat khum vai kichi ahisih a, bang imangmat diei, bang thumavang iphuong diei, kinepna bang chi bangin adieng thei diei, khat leh khat kigintatna khang henlen, himate damsah henlen, mihing kichimatna bawl lei, kinepna khanglosah lei, khat leh khat pan in zil lei, maban a ding bang ikum thei diei, pilvangna bang ichi sui diei, lungtangte bang chi bangin ahatsah diei tualeh tha leh zung bang chibangin ihatsah diei?" chi’n agen dendon hi. Tamteng muolsuo jo nadingin Preparatory Document 32 pan thu akila hi. Kikupnatengah laidal bangza ipuodoh diei chi sangin khat leh khat kitheituohna, kihotuona, kichimatna ei ahing kikhawntengin nei lei ikikupna uh ahing lawching pan ding hi achi hi. Asia Gamkaipi a pawlpi mi ihina toh Hagau ah zawhkhawm lei itup idawitenguh hing piching va achi hi.

Zawkhamna toh kisaia kikupnapi ahijieh in, ahing pang josie kungah thuhil chienna khat hanthawnna akipie masa uhi. Siengthona neia, theichienna leh muchienna anei nadingun, thungetna leh hilchienna akipie masa uhi. Tami dingin Topa Anthony James Corcoran, SJ, Kyrgystan a Apostolic Administratorpa in ahing pei josie kungah thuhilna aneia, theichienna leh muchienna ichi uhi, khuolzanna nam khat ahia, tam khuolzinna ah Hagau Siengtho in iki mapuisah dinguh akisam masa pen hi achi hi. Shina pan a thawkiana toh kibang ahia, eima ngaituote nuasiedoh a Hagau Siengtho in iki mapuisah dinguh ahi achi hi.

Evangelium Gaudium kichi, pawlpi thuhilna lai, No.51 pan in asim a: ‘Pasian Gamlei pan a bang ga e ilaw dinguh tualeh bangin Pasian thuguol asusie e chia muchienna isui dinguh ahi.” Tam toh kikupnate pan vai achi hi.

Topa Clarence Devadass in tutan in FABC in izinna u’ah heisung itungta uoi tualeh FABC Task Force in alui kikup dingteng bang chi bang in ilui ding uoi chi’n ahil hi. Draft Framework kichi, kikup dingteng pan in thu tan pai vai china aomsih a, tami lai hi, kikupna lai ahiboa, kipatsahna thului ahibo hi achi hi. Tam kikupna lai ah, kikuppi ding nam nga akikoi hi: Asian Resonances (Asian Gamkaipi ah bang aw aging e, Asian Tensions (Asia Gamkaipi ah bang kilungnopmawna aom e) Asian Realities and Divergences (Asia Gamkaipi ah bang chientah in akimu e tualeh kibahlohna bang a om e), Gaps Identified in the Asian Responses (Asia Gamkaipi dinga thutanna ah kibahlohna bang aom e) and Priorities from the Asian Responses (Asia Gamkaipi toh kisaia thudawnna ah kibah lohna bang aom e). Atunga thuluiteng pan in Asia Gamkai mite dingin bang ngaituo lei ahoi diei, mipi bang chi bangin kinepna ipie thei diei, tualeh Asia Gamkai mite’n bang athuohla pen uoi, tamteng kikum vai achi hi.

Tami ni a kikupna a lamkai dingin Bishop Stephen Chow SJ, Hong Kong Bishoppa, Lie Susan Pascoe, Synod Task Force for the Continental Stage a panmun luonu leh Joy Candelario, Asian Continental Assembly on Synodality a pang, Bishops’ Conference of the Philippines pan a hing kisawl, amatengin kikupna asai uhi.

Ahing pang josie thu akingensah a, lungsim khuongaina zong akineisah uhi. Tami kikupna ah bang ahing puodoh ding uoi? Bang panmun aluo uoi? ‘Hagau thaneina bang tan atang uoi’? Hichi’n kikupna masangin vai amang masa uhi.

Sun annneh jo in ahing pang josie pawl (group) tuomtuom akikhen ua, atoton ua, akikum ua tuani a Draft Framework (Kikuppi ding thuluite) en a akikupna uh aphuong uhi.