Nigeria gam ah Biehinn 2 ki bulu

Nigeria gam ah Biehinn 2 ki bulu

Nigeria gam a thau toi pawl khat in nipi ni zingmawng kikhop laitah in biehinn 2 a bulu na u’ah mi 3 in sina atuoh a tualeh mi 30 val aman uhi.

Apeisa June 19 ni’n tam thau toi pawlte hi motorcycle toh Nigeria, Kaduna state khuosung ah alut ua St. Moses catholic church leh Maranatha Baptist Churh a bulu uhi.

“Tu zingmawng nai 7 vel in biehinn kai hun laitah in tam migiloute’n biehinn ang lu ua asunga kikhomte a sawisa uhi”,

chi’n Reuben Buhari (former spokesman for the local government) in Nigerian newspaper Vanguard kung ah June 19 ni’n thu aphuong hi.

 

“Pasal azi, anu tualeh atanu Baptist Church apat a kimat pieh khat ka houpi a, ei houpi in a aw atun a puonat dante leh azau dante hi koima tunga tung dingin ka deisih hi”, achi hi.

Thu kijah dan in mi 30 kimante khu Baptist te ahia tualeh sina tuoh mi 3 te khu Catholic te ahi.

 

Apeisa June 5 Pentecost Sunday nia Christian 40 Catholic Biehinn a ana kitha zo kaal ni zo in tami biehinn 2 te hi ang kilu kia ahi.

Pentecost Sunday ni’n Islamic extremists te dinga ginmaw pawl in St. Francis Xavier Catholic Church Owo, Ondo State, southwestern Nigeria a biehinn kaite hi thau toh akap uhi.

Bishop Emmanuel Badejo of the diocese of Oyo in Pentecost Sunday nia kithatte vuina leh funeral Mass June 17 ni’n anei pieh a tualeh Nigeria gamsunga Christian te kitha na tungtawn in Nigeria government leh President Muhammadu Buhari tunga alungkimlou nate jong aphuong hi.

Luitung pumpi’a ginna jieh a mi kithat tamnate gam lah ah Nigeria gam ah aginna si pieh mi atampen hi. 2021 kum in mi 4,650 vel ana kithat a tualeh 2022 kumbul lang ah ha 3 sungin mi 900 vel akithat ta hi.

Add new comment

11 + 2 =