Kawl Gam Siempupite’n mipi hu nadingin lampi kihong heh chi uh

Kawl Gam Siempupite’n mipi hu nadingin lampi kihong heh chi uh

Catholic Bishops’ Conference of Myanmar (CBCM) a bishopte’n (siempupite’n) tu Kawl Gam buoi sungin mipi hu thei nadingin lampi kihong heh chi’n angen uhi. Apeisa January 14, 2022 ni’n tangpi kikhopna amang ua, tuani’n tami thu aphuong uhi. Galkap kumpite’n pamgam pan anntang tuibuh, zatui zaha atungsahsih ua, mipite agenthei mama uhi. I gam u’ah kilemna, thudih thuman leh mihing ki itna tung heh ichi u’leh lampi hon angai hi achi uhi. Gamsung gentheina thuohte’n huna tan ding lawm amusih uhi. Pamgam pan in panpina tung thei ahi tualeh ahu nuom zong atam ahi, ahi’n galkap kumpi deibangin sil tulmawte alutsahsih uhi. Themkhat lut tama lezong, galkapte ding ahimaia, mipi’n atang josih hi. Gal jieh a inn leh lo nuasiete agenthei deu uhi. Huna maimai toh hing ahi uhi.

Tukum tokhawmna a hing kalsuon bishopte’n “Mihing hinkhuo jatat vai, kem vai tualeh mipi in mun siengtho a atuom koi biehinnte susiesih vai tualeh zato inn leh sanginnhaw zong galkapte’n jatat hen” chi’n lai ahawm uhi. Kawl Gam bishopte tu-le-tu in alunggim mama uhi ajieh mipite agenthei mama ua, gentheina atawp thei loh dingdan in om. Agentheite ahileh tu buoina sunga bangma sietna bawl loh leh aom muongte ahi uhi. Mipite buoina kal ah, ateh avuoi, numei naupang, china luna tamtah aom nalaia, zatui zaha deibangin akimusih hi. Mi million lam ann angawl hi achi uhi.

Tote, ngahnu siengthote leh biehna lamkaite nasep bishopte’n apatat mama ua, hanthawnna apie uhi. Khuo leh tui taisante kiphuolna mun ah ava pei ua, anntang tuibuh, zatui zaha hawm thei dan in ahawm uhi. Koima pawlpi, koima zat nam chiloh in pawlpi mite’n mi gentheite hu thei dan in ahu gige uhi. Bishopte’n pawlpi lamkaite kungah “Itna nasep nga vawtsih un” chi’n alai gielna u’ah agen uhi. “Pasian toh semton lei bawlla omsih” achi uhi.

Add new comment

1 + 0 =