Kawl Gam a Aung San Suu Kyi kum guh thong kie nalai ding

Kawl Gam a Aung San Suu Kyi kum guh thong kie nalai ding

 

Apeisa 10 January, 2022 ni in Kawl Gam a thukhenna vai inn khat in Pi Aung San Suu Kyi kum guh sung thong tang dingin thutanna aneita hi. Thukhenna masa ah kum ni lien ki pie ahia, tu’n aunpi in kum guh thong tang ding ahita hi. Asia Suh-Suolam (South East Asia) a tami gam a kivaihawmdan Pu Pope Francis in adapi mama hi. Hichia vaihawmna ahileh, galkapte thukhenna vai inn a kisuoh ahia, Naypyidaw Khuopi pan ahi. Kumlui 2021, 1 February a Kawl Gam galkapte’n kumpi dinmun ana kiluo uh ahi. Kigalhona (walkie-talkies) adap nei jieh a kiman ahi. Galkapte’n gam aluo jo un Kawl Gam ah buoina tamtah atunga, mipi uhna (democracy) apei nawnsih a, kum 10 sunga democracy zui den nadinga vaihawmna josie galkapte’n amaimangsahta uhi.

 

Apeisa Nipi zaw Ni Khat ni, 9 January nitah lam in Pu Pope Francis in Kawl Gam adapina aphuong hi. “Unau sanggam a kisantuohna leh kimaituo a kihona om theileh, tam kan omsih. Tam apien thei tah loh jieh in Kawl Gam mite’n athuohlaw uhi” chi’n Vatican Khuopi a gam tuomtuom a hing kalsuon kumpi nasemte (Diplomatic Corps) kungah agen hi. Tualeh hichi’n agen kia a: “Masanglai a Myanmar Gam a gawllamte tu’n galphuol asuohta a, lemna beia summet paimet bawlte’n galvan zuana’n aneita uhi” achi hi.

 

Galkapte’n Pi Aung San Suu Kyi inn ava bulu laitah un, kihona set guh amu ua, tami danbeia gam tuom a na lei ahi chi’n amanu toh amat thata uhi. Tam guoh hiloh in gawtna leh siemmaw tanna sawm le ni vel aphuong ua, hinanleh Pi Suu Kyi in siemmaw tanna abuohkhumte uh angiel hi. Pi Suu Kyi tu’n kum 76 a upa ahita a, kum li jo chiengin kum 80 achingta dinga, lamkai dingin apang jo nawnsih ding hi. Tam tuotna toh kum li abelap uh ahi.

Hichia aki hehnate thusuo saite kungah aunpi in akiphuongsih hi. Pi Suu Kyi dinga a pang, thukhente (Suu Kyi’s lawyers) leh amanu akimusahsih uhi.

 

Thei dinga kilawm in 1991 kum in Pi Suu Kyi in Nobel Peace Prize ana tanga, minthanna leh leitung mite patatna thupi tah in ana tang hi. Thusuo sai Reuterte khat leh ni pen thukhen laitah in ana om sam ua, ahi’n  galkapte agin jieh un thukhennate apusuohsah ngamsih uhi.

Mun tuomtuom a Mihing Kembit Pawlte (Human Rights Groups) in hichia Pi Suu Kyi kibawldan ama mama ua, tambanga galkapte thukhenna pen mihing mudana vai leh naupang thukhenna in amu uhi. Mipi akiphinphin nalai ua, tutan in mi 1,400 in ashilawta uhi. Pu Phil Robertson, Deputy Asia Director Human Rights Watch in hichi’n agen a, “Galkapte thukhenna  pen, naupangte kiapmaina toh ki sun, tualeh Pi Suu Kyi amawpaina uh zong, nuizat huoi achi uhi ajieh pen, amawsahnate uh khat beh atahtah omsih. Galkapte’n Kawl Gam meikuongpi suohsahta uh” achi hi.

 

Kal masa in Cambodia Prime Ministerpa, Pu Hun Sen Kawl Gam ah ava zinta a, Senior General Min Aung Hlaing ava kimupita hi. Mipi’n azada mama uhi ajieh pen Pu Hun Sen inzong Cambodia kum 36 ana uh a, Kawl Gam galkap lienpa toh akikhietna aomsih hi achi uhi. Ama hi Association of South East Asian Nations (ASEAN) a lutang ahia, Kawl Gam ah kilemna khat tut thei leng chia va zinta ahi. Kumlui April ha in  ASEAN lamkaite’n kimutuona khat anei ua, Min Aung Hlaing zong apanga, Kawl Gam a kilemna tun thei nading, lampi nga tah aguong ua, hinanleh Kawl Gam galkapte’n tutan in adonse sih ua, agam ua mipite asosang nalai uhi.

 

 

Add new comment

4 + 2 =