Biehna jieh kibawlsiete dinga thungetna

Biehna jieh kibawlsiete dinga thungetna

Sawtlo nalai in Pu Pope Francis in Rome Khuopi ah thugenna lienpi khat aneia, tua thu ahileh, mun tuomtuom a Khristien kibawlsiete dingin thu ngen chiet vai chi'n hantohna apie hi. Ei Khristiente guoh ihisih ua, biehna tuomtuomte'n zong buoina atuoh uhi chi'n agen hi.

Nuasie Nipi Ni, 23 August ni in leitung pumpi in "Biehna zieh a hasatna tuohte Ni" amanga, hichi'n tu khanto hun nasan inzong biehna zieh mi tamtah akithat a, kimkhat in hawlkhietna leh bawlsietna atang uhi

Apeisa 2019 kum in United Nations General Assembly in biehna jieh a hasatna na tuohte thei zing nadingin August 22 khu atuom koita ua, akum akum tami ni akimelchi den ding ahita hi. Pu Pope Francis in, "I unau sanggamte, biehna khat apom jieh ua kigenthei bawlte dingin thu nget pieh den vai in, eima tahsanna zong akhau den nadingin Pasian kungah kiap vai" chi'n St.Peter Leituol a athugenna ah mipi ahantoh hi.

Mexico a mihon kithana

Pu Pope Francis in, August 24 khu, apeisa kum sawm masanga Mexico a mihon kithana kum sawn achinna ahita hi achia tualeh tana mihon kithatte koi ahiei ichileh, galtai leh vaitai mihon ahia ua, USA zuon a hing kuonte ahi uhi. Amahaw hi khamthei guithei bawlte tha ahi uhi.Suhlam America (South America) gamkaipi (continent) a gam tuomtuom a hing kipan ahi uhi. Agam uh abuoi jieh hinkhuo ahel mama a, hinkhuo lawchin theina USA zuon a hing kuon uh ahia, ahi'n lampi lamkal a khamthei guithei bawlte'n ana that gamta uhi. Pu Pope Francis in, "Amahaw ka dapi mama hi ajieh pen tutan in athatte akiman naisih a, a innkuonpite kap leh mau in aom nalai uhi" chi'n dapina thu atut hi.

Mexico gam a Pu Bishop Martinez in Mexico kumpite kungah hichia mi thatte suidoh teitei ding kisam tualeh amahaw tunga vaihawmna khat nei teitei ding ahi achi vangin, kumpite'n adonsesih uhi. Pope Francis in Mexico a mi kihon thate leh mun tuomtuom a biehna jieh a genthei thuohte akhutuo mama a, hinanleh Vatican Khuopi pan bawl thei bangma aom tuonsih hi. Khristiente leh biehna tuomtuom kibawlsiete pen akibawlsietna gam ua kumpite khut a om ahi. Gam phasat khat ah kumpite'n adonsesih ua kumpi nasan mi genthei bawl in apang zaw uhi.

Add new comment

4 + 1 =