Tonu Mari Lungtang Siengtho kunga Kiapna Siengtho

Tonu Mari Lungtang Siengtho kunga Kiapna Siengtho

Siengtho Peter Biehinnpi

25 March 2022

Aw Mari Pasian Nu leh kote Nu, tu buoina hun laitah in na kahing zuon uhi. Ka Nu uh nahi jieh in nei it a nei thei hi: kaki napnate uh na theichien hi. Hepina toh kiching Nu aw, tamveipi nei chin nei kepna leh nei hamuonna kana tang uhi. Jesu, Kilemna Lengpa kungah zong nei pui zing gige hi. Hitama lezong, lemna lampi kana piel uhi. Apeisa kum zabi sunga tuosietna leh liemnateng ka mangngilta ua, galpi ni laan laia mi million lam a leitung mihingte suotat nadinga a hinkhuo uh na piete zong ka mangngilta uhi.

Gam tuomtuom kipawlkhawmna a kaki thukimnate uh zong ka donse nawnsih uhi. Kilemna deigawte leh khangthate’n ama ban ding ua a mangmatte uh ka theipieh nawinsih uhi. Huoihamna kana motlaw vawt ua, koma gam beh kana khuotuo ua, koma kisapna boh kana del uhi. Pasian kana donsesih ua, du-amna kana nei ua, lungsim buana ka nei ua, lungtaah in ka om ua, mi kap phin ua, muongtah a hinkhuo mangte ka jangnet ua, galvan ka vumsah uhi.

Ka innvengte uh ka kem thada ua, thuatham loh in, leitung ka inn uh zong ka kem thadata uhi. Leitung, ka huon uh ka tuonchil ua, mawna toh Pa sinlung kadasah ua, unau sanggam in hington un chia ei siempa ka thuse nawnsih uhi. Ka ziet ka vei ua omte ka donsesih ua, komatang kaki khuol uhi. Tu’n zummaw tah in hichi’n mau ung: Topa aw ei ngaidam in! Asiengtho Nu aw, mawna a kibuol kote, thazawng kote, hamsatah a ka hinna u’ah, sietna in ei beelzielna ah, sietna galphuol a ka lenna u’ah, Pasian in bangma hun in ei nuasiesih hi chi nei theisah kia a, tu’n ei ensuh inlen itna atha in ei kuosah kia in.

Pasian in, nang, koa dingin ei pie a, na lungtang Siengtho khu pawlpi leh leitung mihingte kibutna hing hita hen. Pasian in kote ei henemna toh nang pen ko kungah ahing omsah a, ka tangthu uh ahing siet chiengin nei kem, nei pui a, nei itna toh nei tenpi hi. Nang langah kahing kihei ua, na lungkot ka kiu ua, ei honpieh in chi’n ka ngen uhi. Khang tungtawn ah ko kungah nahing kihil a, kisiana lampi nei zuonsah hi. Ka khang ua mutzin tung ahita a, ei panpi inlen ei khuotuo in. Khatvei toh hichi’n hing genkia in: “Kei na Nu uh note lah ah ka omsih amah?” Ka lungtang taah uh nang in na lham thei ahi, ka hun uh buoina zong na vengsah thei ahi.

Ka gintatna uh nangma kahing ap uhi. Ze-etna leh thuohna neia ka op sungun, na bil ei daw gige va teh chi’n muong ung. Hichi’n Galilee gamkaih a Kana khuo ah na Tapa kungah na ngen a, hichi’n sil lamdang abawl tua mun ah nang nget jieh in abawlta hi. Kipah tah a kitenna amanthai loh nadingin, na Tapa kungah: “Lengga zu nei nawnsih uh” nava chita hi. (John 2:3). Tuajieh in Nu aw, tua thu na Tapa kunga nava tut khu, tu’n hing tuoi genkia in, ajieh pen kinepna lengga zu kaki tasam uhi, kipahna in ei veta a, sanggam unau ki itna ahing daudeuta hi. Mihing kahina uh khatveiteng ka mangngil jel ua, kilemna pansa a hing kuon silthawnte ka thaangzah jel uhi. Ka lungtang ka lungsim un zauna leh dipkuotna mun ka zuonsah uhi. Nu, na hepina ka ngen vangut uhi. Tuajieh in, Nu aw, ka thungetna uh ei sanpieh in.

Tuipi Zingsol aw, tuipi tunga khuopi hui huoisie tah a lang bangin, kote’n zong gal kasat ua, ka tembaw uh tui ah tumsuhsah sin. Thuhun Tha khang sunga ei ching ei kem Nu aw, kilemna nadinga vai kiguongte hing lawchingsah in. Vangam Lengnu, Pasian guotsa kilemna hing tungsah kia in. Khat leh khat kihuotna, phuba lahnate hiemsiengdoh inlen Kingaidam dingdan ei hil in. Gal pan in ei hiem in, ka leitunguh nuclear gal pan kemchingta’n. Khigui Lengnu, thungetna athupidan leh itna apoimawdan ei hilchien in.

Mihing Innkuon Lengnu, unau a hintondan ei kawpieh in. Kilemna Lengnu, leitungah kilemna hing tungsahta’n. Nu aw, gim pum a nei thunget piehna in ka lungtaahna uh lhamdoh hen. Tami da leh kana jang gawta a na hitui luong in ka lungtanguh pape bangin hing pasah kia hen. Bomtang pawh vanto banga ging ka zah chiengun, ka thungetna un lemna tutta hen. Nu, damna pie ka khutte toh thauvui thautang guo banga luong giing a vaitaite henem hen. Akhuo atui taisante lampi lamkal ah na henem in.

Lungtang gimsi Nu aw, nangma lungtang ei kuosah inlen hepina lungsim ei guon in, hichi’n ka innlum uh aliem, akining koihte dingin ka hong ding uhi. Asiengtho Pasian Nu aw, singlamte phunga na din laitah in Jesu in anuazuipa amu bep in hichi’n agen a: “Tana na Tapa khu” achi hi (John 19:26). Hichi’n kote na angah hing apta hi. Nuazuipa kung leh koteng kungah zong, “Tapa aw, tana na nu khu” achi kia hi. (John 19:27).

Nu Mari, ka hinkhuo u’ah kahing sang ua, ka tangthu uh tungtawn ah ka hing vaidot uhi. Tulai tah in lunggim singim mihingte nang toh singlamte phungah adding ua, nang kungah ahing ki ap nuom uhi tualeh nang tungtawn ah Khrist kungah aki ap siengtho nuom uhi. Ukraine leh Russia mite, itna toh nang kunga zatatna hing piete, tu’n nang kungah ahing ki ap nuom uhi. Amahaw itna in na sinlung adiengsah a, amahaw leh gal in avatsante, kiel in atawpmangte, thudih tang jolohte, azawngkhalte leh gilkiel dangtate na khutuo zing hi.

Tuajieh in Pasian Nu, ka Nu uh, na Lungtang Siengtho ah kahing ki ap ua, hing siensuo in, tualeh pawlpi leh leitung mihing chinteng, adiehdieh in Russia leh Ukraine mite ka hing ap uhi. Kinem tah leh itna suonga kahing ki apna uh eina sanpieh in. “Na gen mabangin kei kungah piengta hen” chia na lungsim siengtho toh na chi jieh in Lemna Lengpa nang laigil pan in ahing piengta hi. Nang lungtang pansa in kilemna in ei ve kia va chi’n kaki nem uhi. Na kungah leitung mihing innkuon maban kahing ap ua, leitung mihingte kinepna hing tangtungsah in, alung himawna u’ah lungtaina na guon in.

Nang thungetna jal in Pasian hepina leh khuotuona leitungah guo bangin hing chiinta hen tualeh hamuonna tu leh tu a leitung mite’n tangta hen. “Na gen mabangin kei kungah piengta hen” chinu aw, na tungah Hagau Siengtho ahing tu hi. Tuajieh in Pasian pan a hing kuon mihingte hamuon theina hing tungta hen. Nang, mihingte dinga “apul zing kinepna tuisam,” ka lungtang gawta uh hing tap chiin in. Na laigil ah Jesu mihingin ahing pieng hi tuajieh in mihingte kungah kipawlkhawmna lungsim hing guon in. Leitung gawllamteng na tuonsanu aw, kilemna lampi ei tuonsahta’n!
Amen.

Add new comment

7 + 2 =